Sjálfsmatsstefna 2013-2015

Sjálfsmatsáætlun MS til þriggja ára
2013 til 2015

Inngangur
Sjálfsmatsáætlun MS byggir á skólanámskrá og sjálfsmatsstefnu Menntaskólans við Sund. Hún er birt á heimasíðu skólans. Verkefnisstjóri um sjálfsmat  er ráðinn til eins árs í senn. Starfshópur um sjálfsmat skóla stýrir sjálfsmatsvinnunni en í honum eru verkefnisstjóri, konrektor, skrifstofustjóri, þrír fulltrúar kennara og þrír fulltrúar nemenda. Sjálfsmatsáætlunin er endurskoðuð árlega.

Aðgerðaáætlun
Skólinn setur sér aðgerðaáætlun um helstu markmið á hverju skólaári og til hvaða aðgerða eigi að grípa til að ná þeim. Aðgerðaáætlun er kynnt á skólafundi eða starfsmannafundi í upphafi haustannar og birt á heimasíðu skólans.

Sjálfsmatsáætlun

Á sviði sjálfsmats er árlega sett fram aðgerðaáætlun þar sem koma fram markmið sem sérstök áhersla er lögð á hverju sinni og aðgerðir tilgreindar sem nota á til þess að ná þeim. Sjálfsmatsáætlun er birt á heimasíðu skólans.

Nemendakönnun
Könnun á gæðum náms og kennslu verður lögð fyrir alla nemendur skólans á Námsnetinu á hverju skólaári. Nemendakönnunin er nú tvískipt, Í sumum áföngum fer matið fram í nóvember en í öðrum áföngum í apríl. Heildarniðurstaðan er kynnt á heimasíðu skólans. Niðurstöður hvers kennara og samanburður við heildina eru birtar kennurum á Námsnetinu eftir annarlok.

Starfsmannaviðtöl rektors

Rektor tekur alla nýja starfsmenn í starfsmannaviðtöl á hverri vorönn. Starfsmannaviðtöl verða við starfsmenn í völdum deildum á vorönn 2014 og 2015. Aðrir starfsmenn geta pantað starfsmannaviðtöl hjá rektor á vorönn 2014 og 2015.

Starfsmannakönnun
Á vorönn er árleg könnun lögð fyrir alla starfsmenn skólans. Þar er spurt um líðan í starfi, starfsskilyrði og afstöðu til málefna sem efst eru á baugi innan faga og í stefnumótun skólastarfsins hverju sinni. Könnunin er tvískipt, fyrst spurningar fyrir alla starfsmenn og síðan spurningar sem eingöngu eru ætlaðar kennurum. Niðurstöður könnunarinnar eru kynntar á starfsdögum í upphafi næsta skólaárs. Tekið er mið af niðurstöðum þessarar könnunar í aðgerðaáætlun skólaársins.

Mat á stjórnendum MS
Á vorönn er árleg könnun lögð fyrir starfsmenn MS þar sem þeim gefst kostur á að meta gæði stjórnunar í skólanum. Lagt er mat á störf rektors, konrektors og kennslustjóra og niðurstöður sendar til viðkomandi stjórnanda.

Námsárangur nemenda
Í lok hverrar annar eru teknar saman niðurstöður (meðaltal, dreifing og staðalfrávik) um námsárangur nemenda í skólanum í heild, í hverjum námsáfanga og hverjum bekk eftir námsgreinum, og eftir kyni í hverjum námsáfanga. Einnig eru teknar saman tölur um fall í aðaleinkunn eftir bekkjum og námsárum. Niðurstöður eru ræddar á fagfundum í janúar og maí og síðan á kennarafundum í kjölfarið. Þar er m.a. farið yfir niðurstöðurnar í greininni og samanburður gerður við fyrri ár og skyldar greinar. Þá er rætt hverju hægt er að breyta til að auka námsvirkni nemenda, hverju þarf að breyta til að bæta námsárangur þeirra nemenda sem verst eru staddir í námsgreininni, hvernig hægt er að auka samráð við nemendur og hvernig nýta má Námsnetið til að auka ábyrgð nemenda á námi sínu. Ennfremur ræða umsjónarkennarar niðurstöður haustannarprófa í sínum umsjónarbekk í byrjun vorannar.

Starfendarannsókn
Starfshópur um rannsókn á eigin starfi hefur að markmiði að gefa starfsfólki tækifæri til að bæta sig í starfi og þróa starfshætti sína með því að gera starfendarannsókn, ígrunda starf sitt og fara í jafningjamat. Hver starfsmaður skoðar afmarkaðan þátt í starfi sínu, safnar gögnum með ýmsum aðferðum, heldur dagbók og fundar með hópnum. Starfendarannsóknarhópur hóf starf í MS haustið 2005. Hópurinn hefur utanaðkomandi faglegan ráðgjafa.

Fundir sjálfsmatshóps með bekkjartenglum
Sjálfsmatshópurinn heldur árlega fund með bekkjartenglum allra bekkja skólans. Þar er rætt um hugmyndir um það sem má bæta í skólastarfinu og í skólanum yfirleitt. Stjórnendur fara yfir hugmyndirnar og rektor setur fram lista yfir viðbrögð skólans við þeim hugmyndum. Því plaggi er síðan dreift til bekkjartengla ásamt fundargerð fundarins.

Fundir stjórnenda með nemendum
Stefnt er að því að rödd nemenda heyrist sem víðast þegar fjallað er um skólamál innan MS. Fulltrúar nemenda sitja skólafundi með öllum starfsmönnum skólans sem haldnir eru tvisvar á hverju skólaári. Fulltrúar nemenda sitja í skólanefnd, skólaráði, stýrihópi sjálfsmats MS og stýrihópi heilsueflandi MS. Á vorönn hvers skólaárs verða haldnir fundir þar sem stjórnendur og sviðstjórar svara fyrirspurnum og hlusta á nemendur segja álit sitt á skólastarfinu. Markmiðið er að efla tengsl stjórnenda og nemenda og gefa nemendum tækifæri til að koma með ábendingar um það sem þarfnast úrbóta í skólastarfinu.

Fundir stjórnenda og kennara faggreina
Stjórnendur halda fundi með kennurum í völdum faggreinum á haustönn 2013, haustönn 2014 og haustönn 2015. Á þessum fundum er rætt við kennara um starfið í deildinni og nýjungar í starfinu. Markmiðið er að efla tengsl stjórnenda og kennara og ræða styrkleika og veikleika í skólastarfinu.

Starfshópar
Innan MS eru starfandi ýmsir starfshópar sem vinna að því að bæta skólastarfið. Verkefnisstjóri stýrir starfi hvers hóps og þar eru fulltrúar kennara og annarra starfsmanna og í sumum þeirra einnig fulltrúar nemenda. Eftirfarandi starfshópar starfa á vorönn 2012: heilsueflandi MS, sjálfsmatshópur og  vinnuumhverfisnefnd.

Hugmyndabanki
Hugmyndabanki var stofnaður á Námsnetinu 2013 þar sem nemendur og starfsmenn geta sett fram hugmyndir um það sem má bæta í skólastarfinu. Hugmyndabankinn verður kynntur sérstaklega skólaárið 2013-14.

Sjálfsmat nemenda
Könnun verður lögð fyrir nemendur á vorönn 2014 þar sem nemendur meta námsvirkni sína og þátttöku í náminu í kennslustundum og heimanámi.

Sjálfsmatsáætlunin er endurskoðuð árlega.