Frávik frá skólasóknarskyldu

Í þremur tilvikum eru nemendur án skólasóknarskyldu: Óreglulegir nemendur, þrepahlauparar og nemendur með frávik í námi.

Um einkunnir nemanda með frávik frá skólasóknarskyldu gildir að hann fær ekki einkunn fyrir skólasókn en nemandinn fær vinnu-/námseinkunnir eftir sérstökum reglum sem koma fram í kennsluáætlun námsgreina fyrir önnina. Reglurnar segja fyrir um hvaða verkefni eigi að vinna, skiladag þeirra og vægi í námseinkunn. Þessi vinnu-/námseinkunn hefur sama vægi í annareinkunn og vinna reglulegra nemenda á önn og kemur í stað venjulegrar námseinkunnar í stúdentsprófsgreinum.

Í greinum með símat er heimilt að láta nemendur án skólasóknar fara í sérstakt próf í stað verkefnavinnu eða hluta hennar. Nemendur án skólasóknarskyldu geta ekki sótt um matseinkunn á vorönn.

Óreglulegir nemendur

Ef sérstakar ástæður, langvinn veikindi, aðrar langvarandi fjarvistir eða félagslegar aðstæður mæla með því, getur rektor veitt nemanda heimild til þess að stunda nám sem óreglulegur nemandi í öllum greinum. Umsóknir um slíkt ásamt tilheyrandi læknisvottorðum og röksemdum verða að berast til rektors.

Óreglulegur nemandi getur ekki sótt um matseinkunn á vorönn. Óreglulegur nemandi hefur rétt til að sækja tíma en hefur ekki skólasóknarskyldu og fær ekki skólasóknareinkunn. Óreglulegur nemandi fær námseinkunn í stúdentsgreinum og vinnueinkunn í framhaldsgreinum. Verkefni nemenda án skólasóknarskyldu eru tilgreind á námsáætlunum í hverri grein.

Þrepahlauparar

Nemanda, sem staðist hefur millibekkjapróf, er heimilt að lesa tvo bekki saman. Nemanda, sem fallið hefur á aðaleinkunn á millibekkjaprófi, er óheimilt að lesa tvo bekki saman. Nemanda, sem staðist hefur kröfur um aðaleinkunn á millibekkjaprófi en fallið á endurtökuprófi í einni grein, er heimilt að sækja til skólaráðs um leyfi til að lesa tvo bekki saman. Skólaráði ber að meta hverja umsókn fyrir sig og afgreiða hvert erindi með tilliti til heildarstöðu nemandans í námi. Umsókn um þrepahlaup þarf að berast í upphafi skólaárs.

Sá sem les tvo bekki saman er skráður til reglulegs náms í neðri bekkinn af þeim tveimur sem um ræðir en telst óreglulegur í efri bekknum, sbr. reglur um óreglulega nemendur hér að framan. Nemanda, sem er að taka bekk upp aftur, er heimilt að láta einkunnir í stúdentsprófsgreinum standa ef þær uppfylla lágmarkskröfur, þ.e. bæði í stúdentsprófseinkunn og lokaeinkunn í námsgrein.

Nám í neðri bekk hjá þrepahlaupara hefur forgang. Ef þrepahlaupari mætir illa eða aðaleinkunn hans á haustannarprófi er lægri en 5,0 missir hann rétt sinn til að lesa námsefni tveggja skólaára saman. Nám sem nemandi lýkur í efri bekknum öðlast ekki formlegt gildi fyrr en hann hefur staðist neðri bekkinn að fullu. Þrepahlaupari fær ekki skólasóknareinkunn í efri bekknum.

Þrepahlaupari fær námseinkunn í stúdentsgreinum og vinnueinkunn í framhaldsgreinum. Verkefni nemenda án skólasóknarskyldu eru tilgreind á námsáætlunum í hverri grein.

Nemendur með frávik í námi

Nemandi, sem er metinn inn í skólann úr öðrum framhaldsskóla eða skiptir um námsbraut, getur þurft að taka grein eða greinar sem bekkjarfélagar hans hafa þegar lokið. Í slíkum tilvikum stundar hann nám í greininni eða greinunum án skólasóknarskyldu ef það er nauðsynlegt vegna árekstra í töflu. Nemandi fær ekki skólasóknareinkunn í þessari grein/ þessum greinum.

Aðaleinkunn slíkra nemenda að vori skal gera upp á grundvelli þeirra námsgreina sem tilheyra bekknum sem nemandinn er skráður í. Um fráviksgreinarnar gilda almennar reglur um lágmark í grein, framhalds- eða lokagrein eftir því sem við á.

Nemandi með frávik í námi fær námseinkunn í stúdentsgreinum og vinnueinkunn í framhaldsgreinum. Verkefni nemenda án skólasóknarskyldu eru tilgreind á námsáætlunum í hverri grein.