Haustannarpróf 2013

Haustannarpróf hófust í dag, þriðjudag 3. desember, en síðasti almenni prófdagur er mánudagur 16. desember. Á prófatíma fellur kennsla niður og skólinn er allur skipulagður fyrir prófahald. Aðstaða til að lesa fyrir próf er á bókasafni skólans frá 8:00-16:00, í kennslustofum í Fensölum frá kl. 8:00-16:00 virka daga frá 3.-13. desember og Skálholt í Þrísteini er opið frá kl. 12:00 til 21:00. Tölvustofur eru opnar frá 8:00-16:00. Próftafla haustannarprófa er á heimasíðu MS og próftafla hvers nemanda fyrir sig er aðgengileg í INNU til 6. desember.

Lokað verður fyrir aðgang nemenda að Innu frá 6. -19. desember en einkunnir verða birtar í Innu þann 19. desember kl. 20:00. Veikist nemandi á prófatíma þarf hann að tilkynna veikindi með tölvupósti á msund@msund.is eða í síma 580 7300 áður en próftími hefst. Nemendur undir 18 ára eiga að skila vottorði frá foreldrum en aðrir skila læknisvottorði áður en sjúkrapróf er haldið. Sjúkrapróf verða 17. desember en nánari tímasetning þeirra verður birt á heimasíðu skólans þann 15. desember. Prófsýning verður í skólanum föstudaginn 20. desember kl. 12:30-14:00 og hvetur skólinn nemendur til að koma á prófsýningu. Þar gefst nemendum tækifæri til að skoða prófið með kennara sínum og fá skýringar og gera athugasemdir ef þeir telja þörf á. Það sama á um samsetningu námsmats í símatsgreinum.

Prófreglur er að finna á heimasíðu skólans. Rétt er að geta þess að símar eru bannaðir í prófum. Nemendur mega ekki vera með síma á sér í prófi. Hægt er að geyma síma í læstum hólfum sem er m.a. að finna hjá baðverði og á ganginum inn af anddyri aðalbyggingar skólans.

Jólafrí hefst 21. desember og kennsla hefst að loknu fríi mánudaginn 6. janúar samkvæmt stundaskrá. Breytingar á stundaskrá vorannar sjá nemendur í Innu í fyrsta lagi 3. janúar 2014.

Eldri fréttir