Blóm marsmánaðar

Fjalldalafífill: Blóm marsmánaðar

Einn um sinn verðum við að orna okkur við minningar um blóm liðinna sumra. Blóm marsmánaðar í MS er fjalldalafífill sem skartar á sumrin yndisfögrum stórum, dumbrauðum, bjöllulaga, drúpandi blómum.

Á annarri hæð aðalbyggingar skólans er bókin Flora Islandica (Rv. 2008) opin á blaðsíðu 210 þar sem sjá má plöntuna en bókin skartar blómateikningum Eggerts Péturssonar sem upphaflega voru gefnar út sem myndefni í Íslenskri flóru Ágústs H. Bjarnasonar.

Í bók Ágústs kemur fram að fjalldalafífillinn (Geum rivale) sé af rósaætt (Rosaceae). Vöxtur jarðstöngulsins fari að mestu fram í efsta hluta hans. Stöngullinn sé hulinn löngum, bleðlóttum stofnblöðum sem minni á kálblöð. Þar segir einnig meðal annars að plantan vaxi í rökum og gróskumiklum lautum og hvömmum, blómgist í júní og sé 10-50 sm á hæð.

Í bókinni Íslensk flóra eftir Ágúst H. Bjarnason (Rv. 1994) kemur auk þess fram rót fjalldalafífils geymi ýmis ilm- og bragðefni sem áður voru notuð sem krydd, bæði í mat og drykk (engjanegulrót). Gömul nöfn plöntunnar séu fjalldæla, biskupshattur og sólsekvía.

Í bókinni Íslenskar lækningajurtir eftir Arnbjörgu Lindu Jóhannesdóttur (Rv. 1992) kemur ennfremur fram að fjalldalafífillinn sé allur góður við lystarleysi og lélegri meltingu og ennfremur styrkjandi. Einnig að te af jurtinni í blóma sé talið gott við þrálátu lungnakvefi og stíflum í ennisholum.

Fjalldalafífillinn er algengur um allt land, sbr. upplýsingar í Plöntuvefsjá Náttúrufræðistofnunar Íslands. Þess má geta að hann er meðal annars að finna í brekkunni vinstra megin við göngustíginn að Gullfossi.

Sjá nánari upplýsingar á Vísindavefnum þaðan sem myndin hér að neðan er fengin.

Eldri fréttir