Blágresi: Blóm febrúarmánaðar

Blóm febrúarmánaðar í MS er blágresi sem hefur orðið skáldum að yrkisefni.  Um þetta leyti árs blómgast varla önnur blóm en frostrósir. Víst eru frostrósir á glugga ægifagrar en þrífast alls ekki á tvöföldu einangrunargleri nútímans. Valið helgast af því að „blágresið blíða“ gefur fyrirheit um fríðar hlíðar og birtu sumarsins svo sem Jón Thoroddsen kveður um í kvæðinu: Hlíðin mín fríða.

Á annarri hæð aðalbyggingar skólans er bókin Flora Islandica (Rv. 2008) opin á blaðsíðu 246 þar sem sjá má plöntuna en bókin skartar einmitt blómateikningum Eggerts Péturssonar sem upphaflega voru gefnar út sem myndefni í Íslenskri flóru Ágústs H. Bjarnasonar.

Í bók Ágústs kemur fram að blágresi sé af blágresisætt (Geranium). Þar segir meðal annars að stöngullinn vaxi upp af skriðulum jarðstöngli, blöðin séu stór,  handskipt með flipóttum og tenntum blaðhlutum. Ennfremur segir að efri hluti stönguls og bikarblöð séu kirtilhærð, krónublöð séu venjulega fjólublá en stundum hvít eða rósrauð. Blágresið blómgast í júní. Það verður eðli málsins samkvæmt stórvaxnast á friðuðu landi.

Í bókinni Íslensk flóra eftir Ágúst H. Bjarnason (Rv. 1994) kemur auk þess fram að seyði af jurtinni var notað í lækningaskyni og að áður fyrr var jurtin notuð til að lita blátt en aðferðin gleymdist þegar farið var að flytja índígóbláma til landsins en jurtin var einnig nefnd litunargras.

Í bókinni Íslenskar lækningajurtir eftir Arnbjörgu Lindu Jóhannesdóttur (Rv. 1992) kemur ennfremur fram að blöðin séu góð til útvortis notkunar, soðin og síðan lögð við sár, mar eða exem.

Blágresið er mjög algengt um allt land, sbr. upplýsingar í PlöntuvefsjáNáttúrufræðistofnunar Íslands.

Þá má geta þess að bæði peysa (í blaðinu Lopi og band) og hljómsveit hafa hlotið nafnið Blágresi.

Myndin hér að neðan af blágresinu er á Wikipedia.

Eldri fréttir