Einir: Blóm desembermánaðar

Blóm desembermánaðar í MS er einir. Helgast valið af því að á árum áður, þegar hver varð að bjarga sér sem best gekk, smíðaði fólk gjarnan sjálft sín jólatré. Síðan var haldið af stað og náð í einigreinar og þær bundnar á jólatrésgrindina. Þá var komið grænt og fallegt jólatré en einir er einmitt barrtré og því sígrænn.

Á annarri hæð aðalbyggingar skólans er bókin Flora Islandica (Rv. 2008) opin á blaðsíðu 62 þar sem sjá má plöntuna en bókin skartar einmitt blómateikningum Eggerts Péturssonar sem upphaflega voru gefnar út sem myndefni í Íslenskri flóru Ágústs H. Bjarnasonar.

Á vef Náttúrufræðistofnunar Íslands segir að einir sé fremur lágvaxinn runni og eina villta barrtréð á Íslandi. Þar segir síðan að hann sé fremur algengur um nær allt land og finnist helst í mólendi, hrauni, kjarri og brekkubrúnum. Einirinn hafi nállaga blöð, hann sé oftast jarðlægur en myndi stundum upprétta runna. Þar segir áfram að hin frjóu blöð kvenköngla einis vaxi saman í stórt berkennt aldin, í fyrstu grænt en verður dökkblátt fullþroskað.

Þá kemur einnig fram að forn trú á Íslandi var að til að afstýra húsbruna væri gott ráð að hafa eini í húsinu. Hann má einnig nota til að búa til te og til að reykja lax.

Í bókinni Íslensk flóra eftir Ágúst H. Bjarnason (Rv. 1994) kemur auk þess fram að einirvar fyrrum notaður til að lækna ýmsa kvilla. Bragðið af ensku gini megi ennfremur rekja til olíu úr einiberjum.

Sjá einnig upplýsingar í Plöntuvefsjá Náttúrufræðistofnunar Íslands.

Myndin hér að neðan er tekin af eini í nágrenni Gullfoss í byrjun október. Það tekur berin tvö ár að verða fullþroskuð. Einiber (e. juniper berries, d. enebær, þ. Wacholderbeeren ) eru líka vinsælt krydd, sérstaklega fyrir kryddlegi, t.d. þegar agúrkur eru súrsaðar ennfremur á súrkál og villibráð. Gaman er að skoða einiberjarunna þegar gengið er um landið og athuga hvort berin eru orðin fullþroskuð. Um hátíðarnar ganga svo allir í kringum hinn fræga einiberjarunn ...

Eldri fréttir