Beitilyng: Blóm októbermánaðar

Blóm októbermánaðar í MS er beitilyng. Gaman er að tína beitilyngsvisk á haustin til að setja í lítinn vasa. Þess má geta að það fer mjög vel með bláberjalyngi. Beitilyng stendur ótrúlega vel og er lengi til ánægju. Jafnast jafnvel á við Erikuna og sambærileg blóm sem fást í blóma­búðum á haustin.

Eins og segir á vef Náttúrufræðistofnunar er beitilyng sígrænt lyng sem blómstrar bleikum, drúpandi blómum í ágúst og fram í september. Það er einkum að finna í móum og hlíðum, sérstaklega inn til dala og heiða. Áður fyrr var því trúað að ef beitilyng blómgaðist mjög í toppinn yrði veturinn harður en ef greinaendar voru blómlausir yrði veturinn mildur.

Ofangreindan og frekari fróðleik um beitilyngið er til dæmis að finna í bókinni Íslensk flóra eftir Ágúst H. Bjarnason (Rv. 1994) en þar segir meðal annars að beitilyng hafi fyrrum verið talið afbragðs fóðurjurt, að mýs sæki ekki á þá staði sem því sé troðið og að úr rótum þess megi flétta körfur. Þess er getið að lyngið var vinsælt til litunar því fá mátti fram mörg litbrigði meðal annars með mislangri suðu. Einnig segir að beitilyngshunang sé talið mjög hollt.

Sjá einnig upplýsingar í Plöntuvefsjá Náttúrufræðistofnunar Íslands.

Við skoðun á blómum beitilyngs við Þingvelli síðustu helgina í september sýndust greina­endarnir blómlausir. Eftir því að dæma ætti komandi vetur að vera mildur.

Eldri fréttir