Félagsfræðikjörsvið

Einkennisgreinar félagsfræðikjörsviðs eru félagsfræði og saga og í 4. bekk vinna nemendur stórt kjörsviðsverkefni í annarri hvorri greininni. Einnig er kynning á þjóðhagfræði og fjölmiðlafræði og viðbótarnám við kjarna er í stærðfræði þ.e. tölfræði og ensku en þær eru mikilvægar hjálpargreinar í félagsvísindum. 

Bæði í félagsfræði og sögu er lögð sérstök áhersla á að kenna nemendum öguð vinnubrögð og að þeir öðlist hæfni bæði til sjálfstæðis og samstarfs. Nemendum er kennt að meta heimildir og greina og meta ólík sjónarhorn á söguleg og samtíma málefni.

Í félagsfræði er lögð áhersla á að nemendur öðlist félagsfræðilegt innsæi og þekkingu og skilning á félagsfræðilegum hugtökum og kenningum og geti beitt þeim við túlkun og greiningu á samfélaginu bæði almennt og á tiltekin viðfangsefni. Í 1. bekk er fjallað almennt um íslenskt nútímasamfélag en í efri bekkjunum eru ákveðin afmörkuð efni tekin fyrir t.d. félagsleg lagskipting, stjórnmálafræði og frávik og afbrot. Ítarlega er fjallað um helstu rannsóknaraðferðir félagsvísindanna. Í 4. bekk velja nemendur á milli þemaáfanga í félagsfræði og félagssálfræði annars vegar og alþjóðastjórnmálum og þróunarlöndum hins vegar.

Í sögu er lögð áhersla á að flétta saman mannkynssögu og Íslandssögu með það að markmiði að nemendur öðlist þekkingu og tilfinningu fyrir ólíkum skeiðum sögunnar og sjái sögu Íslands í samhengi við sögu umheimsins. Viðfangsefnið er saga mannkyns frá upphafi vega fram á líðandi stund og saga Íslands frá landnámi til sama tíma. Sérstök áhersla er lögð á menningarsögu í 3. bekk og sögu 20. aldar í 4. bekk. Í 4. bekk velja nemendur einnig á milli félagssögu og samtímasögu.

Nám á félagsfræðikjörsviði veitir góða almenna alhliða menntun og góðan undirbúning undir nám á háskólastigi í sögu, lögfræði, kennarafræðum, þroskaþjálfun og í ýmsum félagsgreinum svo sem félagsfræði, stjórnmálafræði, fjölmiðlafræði, mannfræði og félagsráðgjöf.

Félagsfræðabraut, félagsfræðikjörsvið
		námsár
Námsgreinar		1. b.	2. b.	3. b.	4. b.	ein.
1.	Íslenska (15)	4	3	4	4	15
2.	Erlend mál (33)
	Danska	3	3			6
	Enska	4	4	4	3	15
	Þriðja mál (FRA/ÞÝS)		4	4	4	12
3.	Samfélagsgreinar (48)
	Lífsleikni	3				3
	Félagsfræði	3	3	9	6	21
	Fjölmiðlafræði		3			3
	Þjóðhagfræði			3		3
	Saga		4	5	6	15
	Landafræði	3				3
4.	Náttúrufræðagreinar (9)
	Náttúruvísindi/ Líffræði	3				3
	Náttúruvísindi/ Jarðfræði	3				3
	Náttúruvísindi/ Eðlis- og efnafræði		3			3
5.	Stærðfræði (12)	6	6			12
6.	Íþróttir (8)	2	2	2	2	8
7.	Kjörsviðsverkefni (3)				3	3
8.	Valgreinar (2 á ári) (12)			6	6	12
	Samtals einingar:	34	35	37	34	140
	*Kjörsviðsverkefni eru á sviði félagsfræði eða sögu.