Saga í 4.F (f)

SAG 3F6

Saga í 4. bekk, félagsfræðabraut, félagsfræðikjörsviði

(Samsvarar SAG 313 í Aðalnámskrá)

   Námslýsing

Viðfangsefnið er 20. öldin hin skemmri, þ.e. tímabilið frá 1914 og til aldarloka. Fengist við að dýpka þekkingu og skerpa skilning nemenda á sögu þessa tímabils og veita þeim jafnframt markvissa þjálfun í sjálfstæðum vinnubrögðum. Mannkynssagan er í fyrirrúmi, en einnig lögð áhersla á að draga fram hvernig heimsviðburðir aldarinnar komu við Ísland og hvaða áhrif þeir höfðu á sögu lands og þjóðar. Helstu efnisflokkar eru:

Heimsstyrjöldin fyrri og rússneska byltingin. Fjallað um stöðu heimsmála við upphaf fyrri heimsstyrjaldar, gang og eðli stríðsins og friðargerðina í kjölfar þess. Rússneska byltingin skoðuð í ljósi þróunarinnar í alþjóðahreyfingu sósíalista og út frá sérrússneskum aðstæðum. Fjallað um fullveldið 1918 sem áfanga í sjálfstæðisbaráttu Íslendinga.

Átök og andstæður millistríðsáranna erlendis og á heimaslóð. Fjallað um þróun rússnesku byltingarinnar og uppbyggingu kommúnísks þjóðfélags í Sovétríkjunum, vöxt fasismans og valdatöku nasista í Þýskalandi, framvindu mála í Bandaríkjunum og aðdraganda velferðarþjóðfélags í Skandínavíu. Einnig  fjallað um heimskreppuna miklu. Af áhersluþáttum af innlendum toga má nefna upphaf íslenska flokkakerfisins og þróun þess fram að síðari heimsstyrjöld og áhrif heimskreppunnar hérlendis.

Kalda stríðið. Um stöðu heimsmála í stríðslok. Fjallað um upptök og rætur kalda stríðsins og raktar kenningar fræðimanna um það efni. Nemendum veitt sem skýrust mynd af þróun kalda stríðsins allt til loka. Stöðu Íslands í þessu sambandi gerð ítarleg skil og hugað að langvinnum deilum meðal þjóðarinnar um aðild að Atlantshafsbandalaginu og hersetu Bandaríkjamanna hér á landi. Landhelgisbarátta Íslendinga rakin og m.a. athugað hvernig hún tengist utanríkismálum að öðru leyti.

Frelsisheimt nýlenduþjóða. Hugað að heimsvaldastefnunni, orsökum hennar og birtingarformum, og hlutskipti og aðstæðum þeirra þjóða sem urðu þolendur hennar. Fjallað um tilkomu sjálfstæðis- og þjóðfrelsishreyfinga í nýlendunum og hrun hefðbundinnar nýlendustefnu á árunum eftir síðari heimsstyrjöld.

   Kennsluaðferðir

Kennari reifar einstök viðfangsefni í upphafi, en annars er áhersla lögð á sjálfstæða vinnu nemenda þar sem þeir nýta sér jöfnum höndum prentað mál, myndefni og upplýsingar á Netinu.

   Námsmat

Námsþátturinn spannar eina önn (haustönn), en prófað verður úr efninu á yfirlitsprófi til stúdentsprófs að vori. Námseinkunn byggist á haustannarprófi,  verkefnum nemenda og ástundun á önninni.

Nemendur 4. bekkjar á félagsfræðabraut, félagsfræðikjörsviði, velja milli SAG 4F3 og SAG 5F3