Saga í 3.N

SAG 2N3

Saga í 3. bekk, náttúrufræðibraut

(Samsvarar SAG 203 í Aðalnámskrá)

   Námslýsing

Viðfangsefnið er mannkyns- og Íslandssaga frá lokum 18. aldar og fram á líðandi stund. Helstu efnisflokkar eru:

Draumur um betra líf. Hér verður lögð sérstök áhersla á helstu hugmynda- og stjórnmálastefnur 19. aldar, upptök þeirra og rætur, þróun þeirra og áhrif á gerð samfélagsins. Þá verður hugað að breytingum á stéttaskiptingu og mannréttindabaráttu kúgaðra stétta og þjóðfélagshópa. Vesturheimsferðir.

Hversdagslíf og hugmyndastefnur á 19. öld. Brugðið upp sem skýrastri mynd af íslensku samfélagi í upphafi 19. aldar; atvinnuháttum, stjórnarfari og menningarástandi í víðum skilningi. Fjallað um sjálf­stæðisbaráttu Íslendinga, erlendar og innlendar forsendur hennar, og helstu áfanga á leið þjóðarinnar til fullveldis og sjálfstæðis.

Tækninýjungar til góðs og ills.Fjallað um iðnbyltinguna, útbreiðslu hennar og áhrif á samfélagið og stöðu einstakra ríkja og heimshluta. M.a. leitað svara við þeirri spurningu hvort upphaf togaraútgerðar hafi falið í sér iðnbyltingu Íslendinga. Fjallað um efnahagsleg áhrif tækni og orkunýtingar á náttúruna og umhverfi mannsins.

Átök á heimsvísu.Fjallað um báðar heimsstyrjaldirnar, orsakir þeirra og afleiðingar. Sérstaklega hugað að því hvernig þær komu við Ísland og áhrif þeirra hér á landi. Fjallað um rússnesku byltinguna, fasismann og nasismann og kalda stríðið. Sérstaklega athuguð áhrif þessara fyrirbæra hér á landi.

Heimsvaldastefnan.Fjallað um helstu forsendur, hvata og orsakir heimsvaldastefnunnar. Einnig um helstu nýlenduveldin og kapphlaupið milli þeirra, helstu tegundir nýlendna og ólíkar stjórnunaraðferðir nýlenduherranna. Fjallað um frelsisheimt nýlenduþjóðanna á árunum eftir síðari heimsstyrjöld og forsendur hennar. Athugað hvernig einstökum nýfrjálsum ríkjum hefur farnast í ljósi alþjóðlegrar verkaskiptingar sem nýlendustefnan skóp.

   Kennsluaðferðir

Í fyrirlestrum draga kennarar upp meginþróunarlínur og setja einstök atriði í stærra samhengi. Nemendur vinna að einstaklings- og hópverkefnum. Myndefni af ýmsu tagi verður nýtt eftir því sem föng eru á. Nemendur þjálfast í rökræðum um söguleg viðfangsefni í umræðutímum og fyrirlestrum.

  Námsmat

Stúdentspróf er að vori úr námsefni beggja anna. Námseinkunn byggist á haustannarprófi, verkefnum nemenda og ástundun á báðum önnum.