Menningarsaga í 3.M (h)
MEN 2M3
Menningarsaga (listasaga) í 3. bekk, málabraut, hugvísindakjörsviði
(Námsþátturinn á sér ekki beina samsvörun í Aðalnámskrá)
Námslýsing
Fjallað er um listsköpun mannkyns frá upphafi fram á okkar daga. Einkum er lögð áhersla á eftirfarandi þætti:
Forsöguleg list.Um elstu minjar sem nú teljast með listaverkum, um nytjagildi og listgildi. Um líkleg tengsl listar og trúarbragða. Um hellamyndir og listsköpun í hefðbundnum samfélögum á síðustu öldum.
Forn menningarríki við austanvert Miðjarðarhaf. Sérstök áhersla á málverk, höggmyndir og byggingar Egypta. Fjallað um trúarhugmyndir þeirra, sérstaklega framhaldslífið og hvernig trúin endurspeglast í listrænum minjum. Um reglur sem stýrðu listrænu handbragði Egypta og um sérstöðu egypskrar listar ef hún er borin saman við hin svæðin þrjú, þ.e. Súmer, Krít og Mýkenu.
Grikkland hið forna og Rómaveldi. Um upphaf grískrar listsköpunar og rætur hennar. Tímabilaskipting listrænna minja. Stíltegundir í leirkeragerð, höggmyndum og byggingum. Um gullöldina og áhrif grískrar listar á tímum hellenismans. Um mikilvægi goðsagna og Hómerskviða. Hvernig Rómverjar nýta sér gríska arfinn og stuðla að útbreiðslu hans.
Þrjú menningarsvæði við Miðjarðarhaf.Grísk-kaþólskt svæði, rómversk-kaþólskt svæði og lönd múslima. Um klofning rómversku menningarheildarinnar í þrennt í pólitískum og menningarlegum efnum. Áhrif klofningsins á listrænu sviði og áhrif páfans sem samræmingarafls í listsköpun.
Kristin list á miðöldum í Vestur-Evrópu. Um listsköpun í Vestur- og Norður-Evrópu og samruna ólíkra menningarþátta á þjóðflutningatímanum. Hlutverk listar í kirkjulegu starfi. Rómanskur og gotneskur stíll í byggingarlist, höggmyndum og málverki. Um alþjóðlegan gotneskan stíl.
Þáttaskil í vændum. Rædd fullyrðingin: „Endurreisnin hófst í bókmenntum og náði síðar til sjónlista“. (Denys Hay)
Endurreisnarstefnan.Fjallað um þjóðfélagslegar forsendur endurreisnar, nýmæli í listum, einkenni og útbreiðslu. Um mun á frumendurreisn, háendurreisn og maníerisma (síðendurreisn). Um breytingar á þjóðfélagsstöðu listamanna á endurreisnartímanum.
Barokkstefnan. Um einkenni og útbreiðslu stefnunnar í byggingarlist, málaralist og höggmyndalist. Fjallað um hana sem „leiktjöld einveldisins“. Um áhrif siðskipta og gagnsiðbótar á listir og listamenn samtímans. Um rókokkóstíl sem franskt afbrigði barokkstíls.
List og listsköpun um 1800. Fjallað um áhrif frönsku byltingarinnar á listir samtímans. Rætt m.a. um gotneska endurvakningu. Um rómantísku stefnuna sem andsvar gegn skynsemisdýrkun upplýsingaraldar með áherslu á þjóðleg einkenni.
Listbylting á 19. öld. Um áhrif iðnbyltingarinnar á listir samtímans. Um raunsæisstefnuna og áhrif hennar á myndlist. Um forrafaelíta, upphaf módernismans, áhrif ljósmyndatækninnar á myndlist og breytingar á stöðu listamanna í samfélaginu.
Módernismi um 1900. Um einkenni og nýmæli helstu listastefnanna og tekin dæmi um impressionisma, expressionisma, dadaisma, fútúrisma, súrrealisma, kúbisma, Bauhaus, upphaf abstraktlistar o.fl.
Módernismi á 20. öld. Einkenni og útbreiðsla helstu listastefna á síðari hluta aldarinnar, s.s. abstraktlistar, funkisstefnu, konkretlistar, naumhyggju, popplistar, skjálistar, post-módernisma. Skoðuð verk helstu fulltrúa þessara stefna.
Áherslur á einstaka þætti geta verið breytilegar frá ári til árs eftir hvaða þættir eru teknir til umfjöllunnar í sögu 303 hverju sinni.
Markmið
Nemendur
- kynnist í stórum dráttum þróun lista frá fornöld til okkar daga
- þekki helstu listastefnur sem fram hafa komið
- kynnist höfuðatriðum ákveðinna tímabila og hvernig listir tímabilsins tengjast þjóðfélagsháttum og hugmyndheimi
- geti fjallað af þekkingu um sjónlistir, þ.e. höggmyndlist, málaralist, svartlist og byggingarlist
- sæki heim sýningar og söfn m.a. til að kynnast listum líðandi stundar
Kennsluaðferðir
Fyrirlestrar kennara, myndgreining og umfjöllun um einstök listaverk, verkefnavinna nemenda, m.a. myndgreiningar, umsagnir um sýningar og einstök verk, ritgerðir, einstaklingsverkefni og hópverkefni.
Námsmat
Annareinkunnir byggjast á prófi í lok anna ásamt vinnueinkunn fyrir verkefni og aðra þætti námsins á hvorri önn. Prófað verður úr völdum þáttum námsefnisins á yfirlitsprófi í menningarsögu í lok 4. bekkjar skv. nánari ákvörðun hverju sinni.
|