Stærðfræði 1.MF

STÆ 1M6 / STÆ 1F6

Stærðfræði í 1. bekk, mála- og félagsfræðabraut

(Samsvarar STÆ 103 og STÆ 263 í Aðalnámskrá)

   Námslýsing

Jöfnur, rúmfræði og hlutföll: Meginviðfangsefnin eru á sviði rúmfræði en jafnframt er talnameðferð rifjuð upp og  jöfnur. Fjallað er um nokkur hugtök evklíðskrar rúmfræði og hlutverk hennar í vestrænni menningu, hnitakerfi og jöfnu beinnar línu. Varpað er ljósi á hlutfallshugtakið frá mörgum hliðum.

Algebra, föll og talningarfræði: Lagður er grundvöllur að skilningi á tölum, fallhugtakinu og hagnýtingu þess og færni í algebru. Áhersla er lögð á hvernig nota má föll til að leysa hagnýt verkefni. Fengist er við undirstöðuatriði í mengja- og talningarfræði.

   Markmið

Nemendur

-  geti beitt fjölbreyttum vinnubrögðum við lausn stærðfræðilegra verkefna

-  geti sett upp og leyst verkefni sem fela í sér jöfnur og formúlur

-  nái tökum á hlutfallshugtakinu

-  öðlist færni í röksemdafærslu

-  þekki nokkur undirstöðuhugtök evklíðskrar rúmfræði

-  þekki helstu reglur um einslögun, hlutföll og hornaföll í rétthyrndum þríhyrningi

-  þekki undirstöðuhugtök hnitarúmfræði í sléttum fleti

-  hafi góðan skilning á undirstöðuatriðum talnameðferðar og algebru

-  kunni skil á einföldum aðferðum úr talningarfræði

-  þekki fallhugtakið og aðgerðir á föllum

-  þekki annars stigs margliður og geti leyst annars stigs jöfnur

-  geti notað aflestur af gröfum falla til að leysa hagnýt verkefni og þrautir

   Kennsluaðferðir

Kennari fer í aðalatriði texta og reiknar eða útskýrir sýnidæmi eftir því sem þurfa þykir og tími vinnst til. Annars er lögð megináhersla á sjálfstæð vinnubrögð nemenda og að þeir lesi vel texta og skoði eða reikni sýni­dæmi.

   Námsmat

Á málabraut (STÆ 1M6) er þreytt stúdentspróf að vori úr námsefni vetrarins. Námseinkunn er fyrir próf í lok haustannar og frammistöðu á báðum önnum.

Á félagsfræðabraut (STÆ 1F6) byggjast annareinkunnir á prófum í lok anna og vinnueinkunnum fyrir frammistöðu á hvorri önn.