Góðar gjafir frá fyrrverandi nemendum

Menntaskólanum við Sund bárust góðar gjafir í vor frá afmælisárgöngum fyrrverandi stúdenta. Tjarnarsjóðurinn, sem útskriftarárgangur 1977 stofnaði árið 2008 í tilefni af 30 ára stúdentsafmælinu veitir árlega styrk úr sjóðnum og í ár veitti hann kr. 100.000 styrk til starfshóps kennara undir forystu Þóru Víkingsdóttur, sem vinnur að þróun samvinnunáms. Útskriftarárgangur 1983, sem hélt upp á 30 ára stúdentsafmæli, gaf starfsmönnum kaffivél á kaffistofuna.  Skólanum barst einnig gjöf frá útskriftarárgangi 1991, 124.000 krónur til bókakaupa, sem voru gefnar til minningar um Friðrik Ásgeir Hermannsson, sem lést langt um aldur fram. Fyrsti útskriftarárgangur skólans, sem hélt upp á 40 ára stúdentsafmæli sitt í ár, gaf kr. 500.000 í Minningarsjóð Björns Bjarnasonar en sjóðinn stofnuðu þau árið 2003 í tilefni af 30 ára stúdentsafmæli sínu. Árlega fær nýstúdent bókaverðlaun úr sjóðnum og í ár var það Úndína Ýr Þorgrímsdóttir sem hlaut verðlaunin. Hér fyrir neðan er mynd sem tekin var þegar Eiríkur G. Guðmundsson og Ólafur Hauksson heimsóttu MS fyrir hönd 40 ára stúdenta og afhentu styrkinn í Minningarsjóð Björns Bjarnasonar. Hjördís Þorgeirsdóttir, rektor tók á móti styrknum fyrir hönd skólans fyrir framan málverk af Birni Bjarnasyni fyrsta rektor MS.

Eldri fréttir