Dagur íslenskrar tungu

Dagur íslenskrar tungu er í dag, 16. nóvember. Í tilefni dagsins verður hátíðardagskrá í hátíðasal Háskóla Íslands kl. 14:00–15:30 og mun menntamálaráðherra m.a. veita Verðlaun Jónasar Hallgrímssonar en í dag er afmælisdagur þessa þjóðskálds. Í tilefni dagsins opnum við ORÐAGALDUR á vef skólans þar sem fjallað er um skáldskap í skólanum. Þá verða ýmsar uppákomur í skólanum í komandi viku. Sjá einnig vef um Jónas Hallgrímasson [Jónas Hallgrímasson]

Hér að neðan er, í tilefni dagsins, eitt ljóða Jónasar, Alþingi hið nýja (1840):

Hörðum höndum 

vinnur hölda kind 

ár og eindaga; 

siglir særokinn, 

sólbitinn slær, 

stjörnuskininn stritar. 

Traustir skulu hornsteinar 

hárra sala; 

í kili skal kjörviður; 

bóndi er bústólpi, 

bú er landstólpi, 

því skal hann virður vel. 

Fríður foringi 

stýri fræknu liði, 

þá fylgir sverði sigur; 

illu heilli 

fer að orustu 

sá er ræður heimskum her. 

Sterkur fór um veg, 

þá var steini þungum 

lokuð leið fyrir; 

ráð at hann kunni, 

þó ríkur sé, 

og hefðu þrír um þokað. 

Bera bý 

bagga skoplítinn 

hvert að húsi heim; 

en þaðan koma ljós 

hin logaskæru 

á altari hins göfgva guðs. 

Vissi það að fullu 

vísir hinn stórráði. 

Stóð hann upp af stóli, 

studdist við gullsprota: 

„Frelsi vil eg sæma 

framgjarnan lýð, 

ættstóran kynstaf 

Ísafoldar. 

Ríða skulu rekkar, 

ráðum land byggja, 

fólkdjarfir firðar 

til fundar sækja, 

snarorðir snillingar 

að stefnu sitja; 

þjóðkjörin prúðmenni 

þingsteinum á. 

Svo skal hinu unga 

alþingi skipað 

sem að sjálfir þeir 

sér munu kjósa. 

Gjöf hefi eg gefið, 

gagni sú lengi 

foldu og firðum 

sem eg fremst þeim ann.“ 

Þögn varð á ráðstefnu, 

þótti ríkur mæla, 

fagureygur konungur 

við fólkstjórum horfði; 

stóð hann fyrir stóli, 

studdist við gullsprota, 

hvergi getur tignarmann 

tíguglegri. 

Sól skín á tinda. 

Sofið hafa lengi 

dróttir og dvalið 

draumþingum á. 

Vaki vaskir menn, 

til vinnu kveður 

giftusamur konungur 

góða þegna

Eldri fréttir